2Ki 22 | NdeIBE | STEP | UJosiya waba yinkosi eleminyaka eficamibili eqalisa ukubusa njalo wabusa eJerusalema okweminyaka engamatshumi amathathu lowodwa. Ibizo likanina lalinguJedida indodakazi ka-Adayiya; wayevela eBhozikhathi.

2 Kings 22

Ukufunyanwa KoGwalo LoMlayo

1 UJosiya waba yinkosi eleminyaka eficamibili eqalisa ukubusa njalo wabusa eJerusalema okweminyaka engamatshumi amathathu lowodwa. Ibizo likanina lalinguJedida indodakazi ka-Adayiya; wayevela eBhozikhathi. 2 Wenza okulungileyo emehlweni kaJehova njalo wahamba ezindleleni zonke zikayise uDavida, engaphambukeli eceleni kwesokudla loba esenxele.

3 Ngomnyaka wetshumi laficamibili wokubusa kwakhe, uJosiya inkosi wathumela unobhala wakhe, uShafani indodana ka-Azaliya, indodana kaMeshulami, ethempelini likaJehova. Wathi,

4 “Yana kuHilikhiya umphristi omkhulu uyekuthi kalungise imali elethwe ethempelini likaJehova, ekade iqoqwa ebantwini ngabalindi beminyango.

5 Abayigcinise amadoda akhethelwe ukukhangela ukuqhubeka komsebenzi ethempelini. Babe yibo abazaholisa abasebenza ukulungisa kutsha ithempeli likaJehova,

6 ababazi, abakhi lababazi bamatshe. Babe yibo njalo abazathenga amapulanka lamatshe abaziweyo okulungisa kutsha ithempeli.

7 Kodwa akusweleki ukuthi babike ngokusetshenziswa kwemali abayigcinisiweyo, ngoba basebenza ngokwethembeka.”

8 UHilikhiya umphristi omkhulu wathi kuShafani unobhala, “Sengifumene uGwalo lweMithetho ethempelini likaJehova.” Walunika uShafani, owalufandayo.

9 Ngakho wathi, “Izikhulu zakho sezibhadele imali ebisethempelini likaJehova njalo seziyigcinise izisebenzi kanye labakhangela ethempelini.” 10 UShafani unobhala wasebikela inkosi esithi, “UHilikhiya umphristi usenginike ugwalo.” Ngakho uShefani waselubala phambi kwenkosi.

11 Inkosi ithe isiwezwile amazwi oGwalo loMthetho, yadabula izingubo zayo. 12 Yapha leziziqondiso kuHilikhiya umphristi, lo-Ahikhamu indodana kaShafani, lo-Akhibhori indodana kaMikhayiya loShafani unobhala kanye lenceku kaJehova u-Isaya, yathi:

13 “Hambani kuJehova liyengibuzela mina labantu kanye loJuda wonke ngalokhu okulotshwe kulolugwalo olufunyenweyo. Lukhulu ulaka lukaJehova oluvuthayo kithi ngoba okhokho bethu kabawalalelanga amazwi alolugwalo: abakulandelanga konke okulotshiweyo kulo mayelana lathi.”

14 UHilikhiya umphristi, lo-Ahikhamu, lo-Akhibhori, loShafani lo-Asayiya bayakhuluma lomphrofethikazi uHulida umkaShalumi indodana kaThikhiva, indodana kaHarihasi, umgcini wezigqoko. UHulida wayehlala eJerusalema Esigabeni Sesibili.

15 Yena wathi kubo: “Nanku okutshiwo nguJehova uNkulunkulu ka-Israyeli: Tshelani indoda elithume kimi ukuthi, 16 ‘Nanku okutshiwo nguJehova: Ngizakwehlisela incithakalo kulindawo lasebantwini bayo ngakho konke okulotshwe egwalweni olubalwa yinkosi yakoJuda. 17 Ngoba bangihlamukele, batshisela abanye onkulunkulu impepha, njalo bangithukuthelisile ngazo zonke izithombe abazenze ngezandla zabo, ulaka lwami luzavutha kule indawo lungacitshwa muntu.’

18 Tshelani inkosi yakoJuda yona elithume ukuzabuza kuJehova, lithi, ‘Nanku okutshiwo nguJehova uNkulunkulu ka-Israyeli mayelana lamazwi eliwazwileyo: 19 Ngenxa yokuthi inhliziyo yakho ivumile njalo uzithobile phambi kukaJehova lapho usizwa engikukhulume ngendawo le labantu bayo, ukuthi bazakuba ngabaqalekisiweyo bachithwe, njalo ngenxa yokuthi udabule izigqoko zakho wakhala phambi kwami, ngikuzwile, kutsho uJehova.

20 Ngakho ngizakusa kubokhokho bakho, njalo uzangcwatshwa ngokuthula. Amehlo akho awayikuyibona incithakalo engizayehlisela kule indawo.’ ” Ngakho izithunywa zayithatha leyompendulo zayisa enkosini.